FYRIR OKKUR ÖLL

FYRIR OKKUR ÖLL.

Frambjóðendur á listum Sjálfstæðisflokksins fyrir komandi sveitarstjórnarkosningar eru næstum fimm hundruð talsins. Þessi fjölmenna og öfluga sveit vinnur nú stefnumálum sínum fylgis um allt land á lokasprettinum fyrir kjördag. Ég hef verið svo lánsöm að fá tækifæri til að heimsækja frambjóðendur og stuðningsmenn flokksins í mörgum sveitarfélögum á undanförnum vikum. Hvarvetna ríkir metnaður til að gera betur í þágu samfélagsins, með bjartsýni, gleði og kraft að leiðarljósi.

Slagorð Sjálfstæðisflokksins í síðustu alþingiskosningum, „Fyrir okkur öll“, á ekki síður vel við í þessum kosningum. Sveitarfélögin bera ábyrgð á mörgum mikilvægustu hagsmunamálum borgaranna og hafa því veruleg áhrif á lífsgæði okkar allra. Því miður er víða pottur brotinn en við höfum líka dæmin um hvernig hægt er að standa vel að málum, veita góða þjónustu og sýna á sama tíma ráðdeild í rekstri.

Höldum áfram góðum verkum á Akranesi

Á Akranesi hefur Sjálfstæðisflokkurinn haldið styrkum höndum um rekstur bæjarfélagsins síðustu fjögur ár eins og fram kemur í nýlegri skýrslu Samtaka atvinnulífsin þar sem Akranes trónir á toppnum í rekstri stærstu sveitarfélaga á Íslandi.
Þetta gerist þrátt fyrir að hvergi sé slakað á í þjónustu við íbúa eins og endurteknar þjónustukannanir um ánægju íbúa sýna.

Ég veit að frambjóðendur Sjálfstæðisflokksins á Akranesi hafa það sem þarf til að nýta tækifærin. Með öflugum nýjum oddvita, reynslumiklu fólki og nýju fólki með ferska nálgun er listinn skipaður metnaðarfullu fólki sem saman vilja halda áfram að gera Akranes að framúrskarandi bæjarfélagi að búa í – fyrir okkur öll.

Nýtum tækifæri hverrar byggðar

Ég er stolt af því að frambjóðendur Sjálfstæðisflokksins víðsvegar um landið hafa slegið réttan tón í nálgun sinni á viðfangsefnin. Að sjálfsögðu er höfð uppi eðlileg og málefnaleg gagnrýni á frammistöðu og stefnumál annarra en megináherslan er á ágæti okkar eigin stefnu, góða frammistöðu þar sem við höfum verið við stjórnvölinn, og tækifærin sem við sjáum í hverri og einni byggð; tækifærin til að gera betur fyrir okkur öll.

Ég trúi að byggðir landsins eigi sér bjarta framtíð. Með skynsamlegum áherslum geta stjórnvöld bæði á landsvísu og á hverjum stað lagst á eitt um að nýta með ábyrgum hætti þau tækifæri sem sannarlega eru fyrir hendi á mörgum sviðum, til að mynda í ferðaþjónustu, fiskeldi, iðnaði, matvælaframleiðslu og margvíslegri nýsköpun á þessum sviðum og fleirum. Krafturinn býr í fólkinu og hugvitinu eru lítil takmörk sett; verkefni okkar stjórnmálamanna er að hlúa að jarðveginum og sjá til þess eins og frekast er unnt að forsendur séu til staðar til að hægt sé að nýta tækifærin. Ég get fullvissað lesendur um að við finnum öll til ábyrgðar í þeim efnum og verkefnin eru ærin.

Ég veit að frambjóðendur Sjálfstæðisflokksins hafa það sem þarf til að nýta tækifærin.

HÖLDUM ÁFRAM
Þórdís Kolbrún Reykfjörð Gylfadóttir
Varaformaður Sjálfstæðisflokksins

You may also like...